لاہور(نامہ نگار)ڈسٹرکٹ پولیس لائنز قلعہ گجر سنگھ میں گزشتہ روز کانسٹیبل سے ہیڈ کانسٹیبل کے عہدوں پر ترقی پانے والے پولیس اہلکاروں کو پروموشن بیجز لگانے کی تقریب منعقد ہوئی۔سی سی پی او لاہوربلال صدیق کمیانہ تقریب کے مہمان خصوصی تھے۔ایس ایس پی ایڈمن عاطف نذیر،ایس پی ہیڈ کوارٹرز اویس ملک،ڈی ایس پی کاشف ڈوگر اور دیگر سینئر پولیس افسران نے تقریب میں شرکت کی۔سی سی پی او لاہور بلال صدیق کمیانہ اور ایس پی ہیڈکوارٹرز نے ترقی پانے والے اہلکاروں کو اگلے عہدے کے پروموشن رینک کے بیج لگائے۔ کانسٹیبل رینک سے ہیڈکانسٹیبل پروموٹ ہونے والے 132 پولیس اہلکاروں کو ترقی کے بیجز لگائے گئے۔ترقی پانے والوں میں آپریشنز ونگ کے 60،انوسٹی گیشن کے 22، سکیورٹی ڈویژن کے15،دیگر یونٹس کے 35اہلکار، 10 لیڈی پولیس اہلکار اور ایلیٹ فورس کے 11 جوان شامل ہیں۔سی سی پی او لاہور بلال صدیق کمیانہ نے ترقی پانے والے پولیس اہلکاروں کو مبارکباد دی اور کہاکہ بروقت ترقی ہر آفیسر کا بنیادی حق ہے۔ترقی ملنے سے افسران اور اہلکاروں کی کارکردگی میں مزید بہتری اور نکھار پیدا ہوگا۔انہوں نے کہا کہ عہدہ بڑھنے سے ذمہ داریوں میں بھی اضافہ ہوتا ہے۔انہوں نے امید ظاہر کی کہ ترقی پانے والے پولیس افسران بہترین صلاحیتوں کا مظاہرہ کرکے شہریوں کیلئے آسانیاں پیدا کریں گے۔