لاہور(سپورٹس رپورٹر)شاہ زیب خان اور شیر دل خان کی عمدہ بیٹنگ کی بدولت خیبر پی کے وائٹس نے سنٹرل پنجاب بلیوز کو 5 وکٹوں سے ہرا کر نیشنل انڈر 19 کپ جیت لیا۔ فاتح ٹیم نے 215 رنز کا ہدف 47ویں اوور کی پانچویں گیند پر حاصل کرلیا۔شاہ زیب خان نے 73 ‘شیر دل خان 44 رنز بنا کر ناٹ آؤٹ رہے۔سنٹرل پنجاب بلیوز کے آذان اویس کی سنچری رائیگاں گئی۔ ان کی 125 گیندوں پر 100 رنز کی اننگز کر مدد سے سنٹرل پنجاب بلیوز نے 8 وکٹوں پر 214 رنز بنائے تھے۔ عباس علی نے 3 وکٹیں حاصل کی ۔شاہ زیب خان کو میچ میں 73 رنز بنانے اور تین کیچز پکڑنے پر پلیئر آف دی فائنل قرار دیا گیا۔ خیبر پی کے وائٹس کے عباس علی کو مجموعی طور پر 10 وکٹیں اور 172 رنز سکور کرنے پر پلیئر آف دی ٹورنامنٹ قرار دیا گیا۔ سندھ وائٹس کے علی اسحاق 316 رنز بنا کر ٹورنامنٹ کے بہترین بیٹر اور سندھ بلیوز کے آفتاب ابراہیم 13 وکٹیں حاصل کرکے ایونٹ کے بہترین باؤلر قرار پائے۔ وکٹوں کے پیچھے 9 شکار اور 274 رنز سکور کرنے پر سندھ بلیوز کے سعد بیگ ٹورنامنٹ کے بہترین وکٹ کیپر قرار پائے۔فاتح ٹیم کو 10 لاکھ روپے اور ٹرافی بطور انعام دی گئی۔ رنرزاپ کو ٹرافی سمیت 5 لاکھ روپے کی انعامی رقم دی گئی۔