ریاض، واشنگٹن (امیر محمد خان+ این این آئی+ نوائے وقت رپورٹ) سعودی عرب کے فرمانروا شاہ سلمان نے عیدالضحیٰ کے موقع پر اپنے پیغام میں کہا ہے کہ کرونا وائرس کی وبا کے خلاف مثبت اقدامات کی وجہ سے رواں برس عازمین حج کی تعداد میں 10 لاکھ تک پہنچی، سرکاری ٹی وی پر اپنے خطاب میں شاہ سلمان نے امت مسلمہ، اسلامی ممالک کے سربراہان کو عید کی مبارکباد دیتے ہوئے دعا کی کہ وہ تمام عازمین کا حج قبول فرمائے۔ انہوں نے حج کے امور اور انتظام دیکھنے والوں کی کوششوں کو بھی سراہا۔ انہوں نے کہا اللہ تعالیٰ عالم اسلام کو مزید استحکام، امن و خوشحالی عطا فرمائے۔ ادھر امریکی صدر جوبائیڈن نے عیدالاضحی کے موقع پر مسلمانوں کو مبارکباد کا پیغام دیا ہے۔ جوبائیڈن نے کہا کہ امریکہ اور دنیا بھر میں عیدالاضحی مناتے لوگوں کو عید اور حج مبارک ہو میری اور جل کی طرف سے آپ سب کیلئے خوشیوں بھری خوشگوار چھٹی کیلئے نیک تمنائیں۔