نواب شاہ (نوائے وقت رپورٹ) پیپلزپارٹی کے شریک چیئرمین آصف علی زرداری نے کہا ہے کہ دلی خواہش ہے کہ اپنی زندگی میں بلاول کو وزیراعظم بنتا دیکھوں۔ نوابشاہ میں پارٹی کارکنوں اور عہدیداروں سے ملاقات کے دوران انہوں نے کہا کہ کارکن میرے دست و بازو ہیں۔ مجھے اپنے کارکنوں پر فخر ہے۔ میں اب پنجاب جا رہا ہوں جس طرح سندھ میں پارٹی مضبوط ہے اسی طرح پارٹی پنجاب میں بھی موجود ہے۔ اب میں لاہور کو اپنا ہیڈ کوارٹر بناؤں گا اور پارٹی کو پنجاب میں بھی سندھ کی طرح فعال و مضبوط بنائیں گے۔ ہماری میت جب لحد میں اتاری جائے گی تو ہمارا کفن پارٹی پرچم  ہوگا۔ پیپلزپارٹی کی سیاست عوام کی خدمت ہے۔ پیپلزپارٹی کے عوامی نمائندے سندھ کے عوام کی خدمت میں پوری توانائیاں صرف کردیں۔ سابق صدر کی جانب سے تحصیل دوڑ اور سٹی نواب شاہ میں بلدیاتی انتخابات کے پہلے مرحلے میں کامیاب ہونے والے عوامی نمائندگان کے اعزاز میں عشائیہ دیا گیا، عشائیے میں چودھری طارق، ضیاء الحسن لنجار، علی اکبر جمالی، علی حسن زرداری، سید سردار علی شاہ، علی مدد جتک، سلیم رضا جلبانی، غلام قادر چانڈیو ودیگر موجود تھے۔ آصف علی زرداری نے بلدیاتی انتخابات میں پی پی پی امیدواروں کو منتخب کرنے پر عوام کا شکریہ ادا کیا۔ تیر کے نشان پر کامیاب ہونے والے امیدواروں کو شاباش بھی دی۔ ایک دن کا قصہ نہیں ہمارا مذہب بھی پیپلز پارٹی ہے۔ بلوچستان، خیبر پی کے پنجاب ہو یا سندھ تمام صوبوں کو مضبوط کیا ہے۔ وہ کہتے ہیں تم نے کمزور کیا ہے۔ میں کہتا ہوں مضبوط کیا ہے۔ میرا آج بھی اسلام آباد سے جھگڑا ہے۔ اختیارات کے بدلے  اٹھارویں ترمیم لی۔ 18و یں ترمیم صوبوں کو مضبوط کرتی ہے۔ اپنے دور صدارت میں تمام اختیارات وزیراعظم کو منتقل کئے۔ تم کتنے بھٹو مارو گے ہر گھر سے بھٹو نکلے گا۔ ہم قبر میں بھی اترتے ہیں تو ہمارے  کفن پر پیپلز پارٹی کا جھنڈا ہوتا ہے۔ بلاول جس ملک میں گئے وہاں سے دوستوں کے فون آئے کہ بلاول اچھی منسٹری چلا رہے ہیں۔ میں اب لاہور میں بیٹھ کر پارٹی کو دیکھوں گا۔  پنجاب میں بھی پیپلز پارٹی کا وجود ہے۔ وہاں کوئی پارٹی کو دیکھنے والا نہیں۔ بچیوں کو تعلیم دینے میں پاکستان کا بھلا ہے۔ پاکستان کے بھلے میں ہی سب کا بھلا ہے۔ آج ملک میں مہنگائی ہے، یہ سب ان کا قصور ہے جنہوں نے مجھ سے فراڈ کیا۔