اسلام آباد +گجرات(ایجنسیاں+نامہ نگار) وزیراعظم محمد شہبازشریف نے جاتی امرا (رائے ونڈ) میں عیدالاضحی کی نماز ادا کی جبکہ صدر عارف علوی نے عیدالاضحی کی نماز کراچی کی طوبی مسجد میں ادا کی۔ وزیراعظم نے اس موقع پر ملک و قوم کی خوشحالی‘ ترقی اور سلامتی کیلئے دعا کی۔ صدر کے ہمراہ سابق گورنر سندھ عمران اسماعیل‘ پی ٹی آئی ایم پی اے خرم شیر زمان اور شہریوں کی بڑی تعداد نے بھی طوبی مسجد میں نماز ادا کی۔ وزیر خارجہ پی پی پی چیئرمین بلاول بھٹو زرداری نے گڑھی خدا بخش میں عیدالاضحی کی نماز ادا کی۔ چیئرمین بلاول بھٹو زرداری نے وزیراعلیٰ سندھ سید مراد علی شاہ‘ قائم مقام گورنر سندھ آغا سراج الحق درانی نے سابق وزیراعلیٰ سید قائم علی شاہ کے ہمراہ  عیدالاضحی کی نماز ادا کی۔ایم این اے چوہدری مونس الٰہی، ایم این اے چوہدری حسین الٰہی نے نماز عید کنجاہ ہائوس میں ادا کی اور لیگی کارکنوں، بزنس مینوں سے ملاقاتیں کی۔ چوہدری شافع حسین نے ظہور پیلس میں کارکنوں سے عید ملی اورچوہدری پرویز الٰہی کے ہمراہ چوہدری ظہور الٰہی شہید کی قبر پر فاتحہ خوانی کی۔