لاہور(سپورٹس رپورٹر)انگلینڈ کرکٹ ٹیم کے دورہ پاکستان کیلئے انگلش کرکٹ بورڈ کا جائزہ وفد کل اتوارکو پاکستان پہنچے گا۔ذرائع کے مطابق چار رکنی وفد میں پلیئرز ایسوسی ایشن، سکیورٹی اور کرکٹ آپریشنز کے ممبران شامل ہوں گے جو کراچی،لاہور، ملتان اور اسلام آباد کے دورے کریں گے۔ذرائع کا کہنا ہے کہ پاکستان اورانگلینڈ کے درمیان ٹی ٹونٹی اور ٹیسٹ میچز کے مختلف شیڈول پر تبادلہ خیال ہوا ہے تاہم  حتمی شیڈول کا فیصلہ جائزہ ٹیم کی رپورٹ کی بنیاد پر ہوگا۔ انگلش ٹیم رواں سال ٹی ٹونٹی ورلڈ کپ سے قبل سات ٹی ٹونٹی میچز اور بعد میں 3 ٹیسٹ میچز کیلئے پاکستان آئے گی۔ٹی ٹونٹی میچز صرف 2وینیوز کراچی اور لاہور میں ہوسکتے ہیں۔دو وینیوز کی صورت میں 4ٹی ٹونٹی کراچی جبکہ 3لاہور میں کھیلے جائیں گے۔ پاکستان اور انگلینڈ کے درمیان 20، 22، 23 اور 25 ستمبر کو کراچی میں جبکہ لاہور میں28، 30 ستمبر اور 2 اکتوبر کو ٹی ٹونٹی میچز ہوسکتے ہیں۔انگلش ٹیم کی پاکستان آمد 15 ستمبر کو تجویز کی گئی ہے۔