لاہور(اسپورٹس رپورٹر))امریکہ میں جاری ورلڈ اتھلیٹکس چیمپئن شپ میں پاکستان کے ارشد ندیم فائنل میں پہنچ گئے، کوالیفائینگ مرحلے میں اتھلیٹ گروپ بی میں چوتھے نمبر ہر رہے۔اوریگن میں جاری اتھلیٹکس کے اس عالمی میلے میں ارشد ندیم نے مجموعی طور پر ایونٹ میں نویں پوزیشن حاصل کی، پہلی تھرو 76.15اور دوسری تھرو 74.38میٹر پھینکی جبکہ تیسری تھرو 81میٹر کی تھی۔ارشد ندیم نے فائنل میں رسائی پر خوشی کا اظہار کرتے ہوئے 24جولائی کو بھی بہترین پرفارمنس دینے کے عزم کا اظہار کیا ہے جبکہ کہنی کی ابجری مکمل ٹھیک نہ ہونے کے باوجود اس ایونٹ میں پاکستان کی نمائندگی کررہے ہیں۔ بھارت کے نیرج چوپڑا 88.39میٹر تھرو کرکے فائنل میں پہنچ گئے ہیں جبکہ ایونٹ کا فائنل 24جولائی کو ہوگا۔واضح رہے کہ اولمپکس میں پانچویں پوزیشن پانے والے ارشد ندیم نے پنجاب سٹیڈیم میں 6ہفتوں تک کوچ سلمان بٹ اور ڈاکٹر اسد عباس کی نگرانی میں ٹریننگ کی تھی۔ ارشد ندیم کو فائنل کوالیفائی کیلئے ٹاپ 12 میں آنا لازمی تھا۔ارشد ندیم مجموعی طور پر نویں اور اپنے گروپ میں چوتھے نمبر پر رہے۔