لاہور(سپورٹس رپورٹر)قومی ٹیم کے کپتان بابر اعظم نے کہاہے کہ یکے بعد دیگرے وکٹیں گرنے سے دبائو آتا ہے اور سری لنکا کیخلاف دوسرے ٹیسٹ میں بھی ایسا ہی ہوا۔ صبح  پچ مختلف نہیں تھی، ہلکی بارش کے بعد وکٹ سے سپنرز کو مدد ملی، پچ کا زیادہ مسئلہ نہیں تھا، ہماری پارٹنر شپ ویسی نہیں لگی جیسی لگنی چاہئیں تھیں۔ ٹیسٹ کرکٹ میں ہمیں تحمل کیساتھ بیٹنگ کرنی چاہیے جو ہماری بیٹنگ میں نظر نہیں آیا، جس طرح جے سوریا نے بائولنگ کی انہیں کریڈٹ دینا چاہیے۔  یقین تھا کہ میچ میں اچھا کر سکتے ہیں لیکن بیٹنگ یونٹ تحمل کیساتھ نہیں کھیلا۔ سری لنکا میں کنڈیشنز آسان نہیں تھیں لیکن یہاں اچھا بھی ہوا ہے اور برا بھی کھیلے ہیں۔ نوجوان بائولرز بھی بہت آ رہے ہیں، جلد نئے چہرے بھی دیکھنے کو ملیں گے۔ فوکس نیدر لینڈز کیخلاف ون ڈے سیریز پر ہو گا، ابھی ہمارے پاس اس سیریز کی تیاری کیلئے تھوڑا ٹائم ہے،کوشش ہوگی کہ مختصر وقت میں ون ڈے اور ٹی ٹونٹی کے مطابق خود کو ڈھالیں، زیادہ کرکٹ ہو رہی ہے اس لیے آپ کو جلد ہر فارمیٹ کے مطابق ڈھالنا پڑتا ہے۔