اسلام آباد (خبرنگار خصوصی) آرمی چیف جنرل قمر جاوید باجوہ نے رسالپور اور نوشہرہ کا دورہ کیا۔ پاک فوج کے شعبہ تعلقات عامہ (آئی ایس پی آر) کے مطابق آرمی چیف نے یادگار شہداء پر حاضری دی، پھولوں کی چادر چڑھائی اور فاتحہ خوانی کی۔ آرمی چیف کو ملٹری کالج آف انجینئرنگ رسالپور کے امور پر بھی بریفنگ دی گئی۔ اس کے علاوہ آرمی چیف کو کاؤنٹر آئی ای ڈیز سکول کے بارے میں بھی تفصیل سے آگاہ کیا گیا۔ سمز میں تینوں مسلح افواج اور پولیس کے اہلکاروں کو کاؤنٹر آئی ای ڈیز کی ٹریننگ دی جاتی ہے۔ اس تربیت کے نتیجے میں انسداد دہشت کے لئے کامیاب آپریشن کئے جائیں گے اور دہشت گردی کے خلاف جنگ میں بارودی سرنگیں تلف کرنے میں مدد ملے گی۔ آرمی چیف نے کالج کی سٹرکچرل لیب کا بھی دورہ کیا اور مقابلوں کی فاتح ٹیم سے ملاقات کی۔ آئی ایس پی آر کے مطابق آرمی چیف نے کور آف انجینئرز کی مہارتوں کی تعریف کی۔ آرمی چیف نے بعد ازاں آرمر اینڈ میکنائزڈ وار فیئر سکول نوشہرہ کا بھی دورہ کیا۔ اس موقع پر آرمی چیف کو تربیتی امور اور جنگی ضروریات سے متعلق  تفصیلی بریفنگ دی گئی۔ آرمی چیف نے وی ٹی فور ٹینگ ٹریننگ کمپلیکس کا بھی افتتاح کیا۔ اس کمپلیکس میں آرمر کور کے افسران اور جوانوں کو جدید خطوط پر تربیت فراہم کی جا رہی ہے۔ آرمی چیف نے سینٹر آف ایکسلنس فار میکنائزڈ وار فئیر کا بھی افتتاح کیا۔