فیصل آباد (نمائندہ خصوصی) فیصل آباد ائیر پورٹ کے قریب چار گاڑیوں کے مابین ٹکراؤ سے بس ڈرائیور اور خاتون سمیت پانچ افراد جاں بحق ہو گئے جبکہ 32 زخمی ہوگئے۔ زخمیوں میں سے 17 شدید زخمی بتائے جاتے ہیں۔ حادثہ جھنگ روڈ پر ائیر پورٹ سے تھوڑی دور پیش آیا۔ ریسکیو ذرائع کے مطابق فیصل آباد سے ملتان جانے والی مسافر بس ٹائر پھٹنے کی وجہ سے بے قابو ہو کر مخالف سمت سے آنے والی مسافر بس، کار اور رکشہ سے ٹکرا گئی۔ حادثے میں چار افراد موقع پر ہی دم توڑ گئے جبکہ ایک زخمی ہسپتال جا کر زندگی کی بازی ہار گیا۔ زخمیوں میں سے 17 شدید زخمی ہیں، جنہیں الائید ہسپتال میں داخل کروا دیا گیا ہے۔ ان میں سے سات افراد کی حالت نازک بتائی جاتی ہے۔