سکھر (نوائے وقت رپورٹ) پاکستان پیپلز پارٹی کے مرکزی رہنما اور وفاقی وزیر آبی وسائل سید خورشید احمد شاہ نے سکھر میں میڈیا سے گفتگو کے دوران بارش اور سیلابی صورتحال کے دوران سندھ حکومت کی کارکردگی کے حوالے سے سوال کرنے پر میڈیا پر برس پڑے اور کہا کہ ان حالا ت میں ایسے سوالات پاکستان یا سندھ دوستی نہیں دشمنی ہے۔ میڈیا اپنا کام صحیح طریقے سے نہیں کر رہا ہے۔ سکھر کی احتساب عدالت میں پیشی کے بعد میڈیا سے گفتگو کے دوران انہوں نے کہا کہ میڈیا دنیا کو حقیقت بتانے کے بجائے اپنی ریٹنگ چاہتا ہے۔ عمران کی گرفتاری مسئلہ کا حل نہیں۔ ان حالات میں انتخابات ممکن نہیں۔ پاکستان تاریخ کی بدترین سیلابی تباہ کاریوں سے گزر رہا ہے۔ پھیلی تباہی سے نظریں چرا کر سیاست کو ترجیح نہیں دی جا سکتی۔ ہمیں ڈیم بنانا ہوں گے اور پانی کے ضیاع کو روکنا ہو گا۔