لاہور(سپورٹس رپورٹر)انگلینڈ کے خلاف ٹی ٹونٹی سیریز کیلئے قومی سکواڈ کا اعلان اگلے دو روز میں کیا جائے گا، آئی سی سی ٹی ٹونٹی ورلڈ کپ کےلئے بھی سکواڈ جمع کروانے کی کٹ آف ڈیٹ 15 ستمبر ہے جس میں توسیع کیلئے تاحال آئی سی سی سے رابطہ نہیں کیا گیا۔ایشیا کپ میں بیٹرز کی خراب پرفارمنس نے سلیکشن کمیٹی کو ایک ہی سکواڈ کے اعلان کیلئے پریشان کر دیا ہے اور پی سی بی تھنک ٹینک مختلف کمبی نیشنز کیلئے سر جوڑ کر بیٹھا ہے۔بیٹنگ لائن اپ کے کمبی نیشن کو تبدیل کیے جانے کا امکان ہے جبکہ سکواڈ میں 2 وکٹ کیپرز بھی ممکن ہو سکتے ہیں۔فاسٹ باﺅلر شاہین آفریدی کا ابھی ری ہیب جاری ہے اور انہوں نے باﺅلنگ کا آغاز کرنا ہے یہ تمام معاملات تھنک ٹینک کیلئے درد سر بنے ہوئے ہیں۔کٹ آف ڈیٹ میں توسیع کیلئے آئی سی سی سے رابطہ کرنے اور پھر اجازت ملنے کی صورت میں ورلڈ کپ کیلئے سکواڈ کا اعلان انگلینڈ کےخلاف سیریز کے دوران ہوگا ورنہ 15 ستمبر کو ریزرو کھلاڑیوں کے ہمراہ ایک ہی سکواڈ کا اعلان کردیا جائےگا۔