لاہور(سپورٹس رپورٹر) پاکستان ہاکی فیڈریشن کے وفد نے سیکرٹری جنرل پی ایچ ایف حیدر حسین کی قیادت میں سٹیشن کمانڈر پاکستان نیوی کموڈور ساجد حسین (ستارہ امتیاز، ملٹری) سے نیوی سٹیشن ہیڈ کوارٹرز لاہور میں ملاقات کی۔ حیدر حسین نے پاکستان ہاکی کی ترویج و ترقی کے حوالہ سے بریفنگ دی۔ ساجد حسین نے پی ایچ ایف حکام کو چیف آف نیول سٹاف ہاکی کپ کے چوتھے ایڈیشن کے انعقاد کے حوالہ سے تفصیلات سے آگاہ کیا۔ چیف آف نیول سٹاف ہاکی کپ کے انعقاد کے حوالہ سے حیدر حسین نے ٹیکنیکل سپورٹ کی مکمل یقین دہانی کراتے ہوئے کہا کہ نیوی کی جانب سے شاندار ایونٹ میں ملکی سطح کے ٹاپ کھلاڑیوں کو اپنی صلاحیتوں کے جوہر دکھانے کے یکساں مواقع فراہم ہوتے ہیں۔ پاکستان ہاکی کے ٹاپ لیول ٹورنامنٹس میں شمار اس ایونٹ میں کھلاڑیوں کےلئے بیش قیمت انعامات کے تسلسل سے کھلاڑیوں کی حوصلہ افزائی بھی ہوتی ہے۔ انہوں نے سٹیشن کمانڈر پاکستان نیوی کموڈور ساجد حسین کو قومی کھیل کی ترویج و ترقی کے حوالہ سے منصوبہ جات پر بھی بریفنگ دی
۔ کموڈور ساجد حسین (ستارہ امتیاز ، ملٹری) نے پاکستان ہاکی فیڈریشن حکام کو نیوی کی جانب سے قومی کھیل کی ترویج و ترقی کے حوالہ سے اقدامات میں بھرپور تعاون کی یقین دہانی کرائی اور پی ایچ ایف حکام کی سٹیشن ہیڈ کوارٹرز پاکستان نیوی آمد پر شکریہ ادا کیا۔