گوجرانوالہ (نمائندہ خصوصی )چیمبر آف کامرس کے ہونے والے کارپوریٹ کلاس انتخابات میں ون یونٹی گروپ کے 7جبکہ فائونڈرز اتحاد گروپ کا 1امیدوار کامیاب ہو گیا۔ حامیوں نے ڈھول کی تھاپ پر بھنگڑے، پھولوں کی پتیاں نچھاور اور مٹھائیاں تقسیم کرکے جشن منایا۔ گوجرانوالہ چیمبر آف کامرس کے انتخابات  کیلئے صبح نو بجے پولنگ کا آغاز ہوا جو شام پانچ بجے تک جاری رہا۔ 815ووٹوں میں سے 751ووٹروں نے اپنا حق رائے دہی استعمال کیا،  8ووٹ مسترد ہوئے۔ الیکشن کمشن کے فرائض انور اسلم، خواجہ صائم اور بشارت بٹ نے سرانجام دئیے۔ ون یونٹی کی جانب سے عمیر پرویز نے 397، حمیس گلزار مغل نے 396، شیخ نعیم نے382، عثمان یونس نے 381،خالد تنویر نے 376، رانا اختر نے 374، مردان نے 372ووٹ حاصل کرکے فتح اپنے نام کی جبکہ فائونڈرز اتحاد گولڈن احساس گروپ کا ایک امیدوار شیخ عرفات 370ووٹ لیکر کامیاب ہو گیا۔ ون یونٹی گروپ کے قائدین اخلاق بٹ ، شیخ نسیم، ملک ظیہر، شعیب بٹ ، خواجہ ضرار، رانا شہزاد، خواجہ خالد، عمر اشرف، علی ہمایوں، احمد اکرام و دیگر نے کہا کہ کارپوریٹ کلاس کا معرکہ سر کرنے کے بعد ایسوسی ایٹ کلاس میں بھی فتح کا تاج اپنے سر پر سجانے کیلئے فوکس کر لیا ہے۔