اسلام آباد (خبر نگار خصوصی) وفاقی وزیر اطلاعات و نشریات مریم اورنگزیب نے کہا ہے کہ وزیراعظم شہباز شریف اقوام متحدہ کی جنرل اسمبلی کے اجلاس کے موقع پر سپین کے صدر پیڈرو سانچیز سے ملاقات کریں گے۔ منگل کو ٹویٹ میں انہوں نے کہا کہ ملاقات میں تجارت، موسمیاتی تبدیلیوں اور باہمی مفاد کے شعبوں میں دوطرفہ تعاون بڑھانے کے مواقع پر بات چیت ہوگی۔ سابق وزیراعظم عمران خان کے خطاب پر ردعمل کا اظہار کرتے ہوئے مریم اورنگزیب نے کہا ہے کہ عمران خان بلف ماسٹر ہیں، عمران خان صاحب شہباز شریف کے خلاف بیان کا ایک ہی جواب ہے، پاس کر نہیں تے برداشت کر، جس کے اپنے اعصاب نواز شریف‘ شہباز شریف اور مریم نواز کے خوف میں جکڑے ہوں، وہ کس حقیقی آزادی کی بات کرتا ہے؟۔ اپنے بیان میں انہوں نے کہا کہ عمران صاحب مریم نواز کو جیل میں ڈال کر سوچا ڈرا لو گے الٹا مریم نواز کے ڈر اور خوف میں آج تک مبتلا ہو، شہباز شریف کے بیرون ملک دوروں کے دوران واقعی ہی آپ کی جان کو خطرہ ہے، ڈاکٹر پاس رکھیں۔