کراچی(آئی این پی ) شہر قائد کے علاقے بفرزون میں 2 ڈاکو شہریوں کے ہاتھ لگ گئے، جنہیں مشتعل افراد نے تشدد کا نشانہ بنا کر شدید زخمی کر دیا جو ہسپتال میں دوران علاج دم توڑ گئے ۔پولیس نے تحقیقات شروع کردی ہے۔

 دونوں ڈاکوں کو تیموریہ تھانے کے علاقے سیکٹر 15 اے 4 نائس بیکری کے قریب ہفتے کے روز شہریوں نے لوٹ مار کرتے ہوئے قابو کرلیا تھا اور بعد ازاں تشدد کا نشانہ بنایا۔ پولیس نے موقع پر پہنچ کر ڈاکووں کو بہ مشکل شہریوں کے چنگل سے چھڑا کر عباسی شہید ہسپتال منتقل کیا تھا، جو بعد میں دوران علاج جانبر نہ ہو سکے۔ پولیس کے مطابق ہلاک ہونے والے ڈاکوں کا بائیو میٹرک کروایا لیا گیا ہے جس کے بعد ملزمان کی شناخت اور کرائم ریکارڈ سامنے آسکے گا ۔ ہلاک ہونے والے ڈاکووں سے برآمد اسلحہ میں میگزین نہیں تھا، تاہم فوری طور پر یہ نہیں کہا جا سکتا کہ میگزین پستول سے نکل کر کہیں گر گیا یا کسی نے نکال لیا۔