لاہور (سپورٹس رپورٹر) پاکستان ویمن کرکٹ ٹیم کی کپتان بسمہ معروف نے کہا ہے کہ ورلڈ کپ سے قبل ایشیا کپ کے میچز بہت اہم ہیں، بھارت کےخلاف میچ جیتنے کی بھرپور کوشش کریں گے، نوجوان کھلاڑیوں کے پاس کارکردگی دکھانے کا بہترین موقع ہے کہ وہ ٹیم کو ٹورنامنٹ میں کامیاب بنائیں۔ ایشیا کپ انہیں اگلے سال ہونے والے ورلڈ کپ کی تیاری میں مدد دےگا، ہماری پچھلی سیریز اچھی نہیں چلی، اس لیے ہم اپنی ٹیم کو دوبارہ بنانے اور اپنی جیت کا سلسلہ دوبارہ شروع کرنے کی کوشش کریں گے۔ ہمارے کوچز نے کیمپ میں کھلاڑیوں پر بہت محنت کی ہے اور ہم ٹورنامنٹ میں ہونے والے میچوں میں پریکٹس کرنے کی کوشش کریں گے۔

 ٹورنامنٹ کا فارمیٹ ایسا ہے کہ یہ کھلاڑیوں کو متعدد میچ فراہم کرتا ہے جو بالآخر ہمیں اگلے سال ہونے والے ورلڈ کپ کےلئے خود کو تیار کرنے میں مدد فراہم کرےگا، ہم مطمئن نہیں ہوں گے، ٹورنامنٹ میں ہر ٹیم پوری طرح تیار ہو کر آئےگی اور ہم اچھے نتائج دینے کی کوشش کریں گے، بھارت کےخلاف میچ ایک اہم میچ ہے، لیکن اس سے پہلے ہمارے دوسرے کھیل ہیں، ہم ٹورنامنٹ میں رفتار حاصل کرنے کی کوشش کریں گے اور جب یہ ہمارے ساتھ ہو جائےگا تو ہم بھارت کے خلاف کھیل کے منتظر ہوں گے۔