لاہور (سپورٹس رپورٹر) پاکستان اور انگلینڈ کے درمیان سات میچوں پر مشتمل ٹی ٹونٹی سیریز کا آخری اور ساتواں میچ آج اتوار کو لاہور کے قذافی سٹیڈیم میں کھیلا جائیگا ، میچ شام ساڑھے سات بجے شروع ہوگا ، پاکستان اور انگلینڈ کے درمیان سیریز 3-3سے برابر ہے ۔ پاکستان ٹیم کے بیٹنگ کوچ محمد یوسف نے کہا ہے کہ انگلینڈ ٹیم نے عمدہ کھیل کا مظاہرہ کیا کریڈٹ دینا ہو گا۔ فل سالٹ نے پوری سیریز میں اتنے رنز نہیں بنائے جتنے آج بنا دئیے، انہوں نے ہمیں سنبھلنے کا موقع ہی نہیں دیا۔ اوس کا کردار تو ہے تاہم اس کو معذرت بنا کر پیش نہیں کیا جا سکتا، ہمارے بائولرز کے پاس کوئی جواب نہیں تھا، انگلینڈ کے بیٹرز عمدہ کھیلے ہیں۔ انگلینڈ کا سٹائل ہے کہ وہ سٹرائیک ریٹ کم نہیں ہونے دیتے وہ اوپر سے تیز کھیلے اور میچ ہم سے لے گئے۔ پاکستان کے بیٹرز بھی پاور پلے میں تیز رنز کی کوشش کر رہے ہیں، محمد حارث نوجوان بیٹر ہیں انہوں نے کوشش کی لیکن کامیاب نہیں ہوئے۔ مڈل آرڈرز کے بیٹرز بھی اچھا کرنے کی کوشش کر رہے ہیں اور میں بھی انہیں سمجھانے کی کوشش کر رہا ہوں۔ ایشیا کپ میں بھی بیٹرز نے ہی میچز جتوائے ہیں، ہماری کوشش ہے کہ سب کھلاڑیوں کو موقع ملے۔ مڈل آرڈر کو زیادہ ہٹ کیا جا رہا ہے، مڈل آرڈر رنز کر رہے ہیں اور میچز بھی جتوائے ہیں، ٹی وی پر بیٹھے پلیئرز بڑی خامیاں بتا رہے ہیں وہ ہمیں بھی بتائیں تو ہم انہیں ٹھیک کریں۔ شاید ان کی بتائی ہوئی باتوں کا فائدہ ہو اور مڈل آرڈر اچھا کرے، یہ پاکستان کی ٹیم ہے ہم سب نے مل کر محنت کرنا ہے، توقع ہم سب کی یہی ہے کہ آخری میچ میں کامیابی حاصل کریں اور سیریز جیتیں۔