علی پور چٹھہ: اہل علاقہ اور 3 ڈاکوئوں میں فائرنگ کا تبادلہ‘ ایک ڈاکو ہلاک
علی پور چٹھہ (نامہ نگار) ناکہ لگا کر لوٹنے والے ڈاکوئوں اور دیہاتیوں میں فائرنگ کے تبادلہ سے ایک ڈاکو ہلاک‘ ایک زخمی‘ تیسرا فرار جبکہ 3 افراد زخمی ہو گئے ہیں۔ علی پور چٹھہ کے نواحی علاقہ سلہو کے چٹھہ کے ذیشان‘ ابرار‘ موٹرسائیکل پر حافظ آباد سے گھر جا رہ تھے۔ مراجکے چٹھہ پہنچے تو آگے دن دہاڑے آتشیں اسلحہ سے مسلح 3 ڈاکو ناکہ لگا کر لوٹ مار کر رہے تھے۔ انہیں بھی روکا اور چالیس ہزار روپیہ‘ اے ٹی ایم کارڈ چھین لیا اور فرار ہونے لگے تو متاثرہ افراد نے شور مچا دیا۔ ڈاکوئوں نے پیچھا کرنے والوں پر فائرنگ کی۔ لوگوں نے بھی فائر کھول دیا جس کے نتیجے میں ڈاکو عمران نذیر سکنہ پھالیہ ہلاک ہو گیا۔ دوسرا ساتھی علی نواز سکنہ پھالیہ کی ٹانگ پر فائر لگا جبکہ تیسرا ڈاکو فرارہونے میں کامیاب ہو گیا۔ عوامی سماجی حلقوں نے لاء اینڈ آرڈر کی بگڑتی ہوئی صورتحال پر تشویش کا اظہار کیا ہے اور تھانہ کی ناقص کارکردگی پر سراپا احتجاج ہیں۔
