لاہور(سپورٹس رپورٹر)آئرلینڈ کی ویمنز کرکٹ ٹیم کے دورہ پاکستان کا شیڈول جاری کردیا گیا۔3  ون ڈے انٹرنیشنل اور3  ٹی ٹونٹی انٹرنیشنل میچز پر مشتمل سیریز کھیلنے کیلئے آئرلینڈ ٹیم  4 سے 16 نومبر تک پاکستان کا دورہ کریگی۔آئی سی سی ویمنز چیمپئن شپ میں شامل اس سیریز میں قومی خواتین کرکٹ ٹیم اپنا پہلا ایک روزہ انٹرنیشنل میچ 4 نومبر کو قذافی سٹیڈیم لاہور میں کھیلے گی۔مہمان سکواڈ 29 اکتوبر کو لاہور پہنچے گا جہاں وہ چار روز ٹریننگ کے بعد 4، 6 اور 9 نومبر کو3 ون ڈے انٹرنیشنل میچز کھیلے گا۔3میچز پر مشتمل ٹی ٹونٹی انٹرنیشنل سیریز 12،  14 اور 16 نومبر کو کھیلی جائیگی۔ہیڈآف ویمنز کرکٹ پی سی بی تانیہ ملک نے کہا ہے کہ رواں سال کراچی میں کامیابی سے سری لنکا کی میزبانی کے بعد وہ اب لاہور میں آئرلینڈ ویمنز کرکٹ ٹیم کی میزبانی کیلئے پرجوش ہیں۔ ویمنز کرکٹ فینز سے درخواست کی ہے کہ وہ یہ میچز دیکھنے کیلئے زیادہ تعداد میں سٹیڈیم کا رخ کریں۔