جھنگ (نامہ نگار) شہریوں سے نقدی لوٹنے والے ڈاکوؤں کے خلاف پولیس اور عوام کا مشترکہ ایکشن، 1 ڈاکو اپنے ہی ساتھی کی فائرنگ سے ہلاک ہو گیا۔ تفصیلات کے مطابق دو موٹر سائیکل سوار مسلح ڈاکو علاقہ تھانہ قادر پور کے دو مختلف مقامات (بھون اور بوڑی) سے شہریوں سے نقدی لوٹ کر فرار ہو رہے تھے کہ شہریوں کی اطلاع پر ایس ڈی پی او صدر سرکل تنویر امجد اور ایس ایچ او قادر پور غلام محی الدین کی زیر قیادت پولیس کی بھاری نفری نے ڈاکوؤں کا تعاقب کیا۔ نڈھا گھر کے قریب پولیس اور شہریوں نے مسلح ڈاکوؤں کا گھیراؤ کیا۔ فائرنگ کے تبادلے میں ایک ڈاکو اپنے ساتھی کی اندھا دھند فائرنگ کے نتیجے میں ہلاک ہو گیا۔ہلاک ڈاکو کے قبضہ سے پسٹل اور زیر استعمال موٹر سائیکل اور چھینی گئی 1 لاکھ 10 ہزار نقدی بھی برآمد کر لی گئی ۔ ہلاک ہونے والے ڈاکو کی شناخت فاروق تگا کے نام سے ہوئی ہے۔