اسلام آباد (خصوصی نامہ نگار) الیکشن کمشن آف پاکستان نے چیئرمین پاکستان تحریک انصاف عمران خان کے علاوہ قومی اور پنجاب اسمبلی کے حلقوں میں منعقدہ ضمنی انتخابات کے تمام کامیاب امیدواروں کا نوٹیفکیشن جاری کر دیا۔ الیکشن کمشن کی جانب سے این اے-237 ملیر کراچی سے پاکستان پیپلز پارٹی (پی پی پی) کے کامیاب امیدوار عبدالحکیم بلوچ، این اے-157 ملتان سے پی پی پی امیدوار علی موسٰی گیلانی کی کامیابی کا نوٹیفکیشن جاری کر دیا۔ پنجاب اسمبلی کے تینوں حلقوں کے کامیاب امیدواروں کے نوٹیفکیشن بھی جاری کردیے گئے ہیںجن میں پی پی-139 شیخوپورہ سے پاکستان مسلم لیگ (ن) کے چوہدری افتخار احمد، پی پی-2019 سے کامیاب پی ٹی آئی امیدوار محمد فیصل خان اور پی پی-241 بہاولنگر سے جیتنے والے پی ٹی آئی امیدوار ملک محمد مظفر خان شامل ہیں۔ تاہم الیکشن کمشن نے عمران خان کی 6 حلقوں سے کامیابی کا نوٹیفکیشن جاری نہیں کیا۔