واشنگٹن (نوائے وقت رپورٹ ) امر یکہ نے سازش سے عمران خان کی حکومت گرانے کا دعویٰ ایک بار پھر مسترد کر دیا۔ واشنگٹن میں بریفینگ دیتے ہوئے ترجمان امریکی محکمہ خارجہ نیڈ پرائس نے سازش کے ذریعے عمران خان حکومت گرانے کے دعویٰ کے سوال پر جواب دیتے ہوئے کہا غلط اور جھوٹی اطلاعات کے جواب میں درست معلومات دے سکتے ہیں۔ پہلے بھی کہہ چکے ہیں ان الزامات میں کوئی صداقت نہیں۔ نیڈ پرائس نے کہا پروپیگنڈا یا غلط اطلاعات کو دوطرفہ تعلقات کی راہ میں نہیں آنے دیں گے، جانتے ہیں پاکستان میں انتخابات کی تاریخ نہیں دی گئی، پرامن آئینی و جمہوری اقدار کو برقرار رکھنے کی حوصلہ افزائی کرتے ہیں، ایسے مسائل پر تمام پارٹنرز کے ساتھ بات چیت رہتی ہے۔انہوں نے کہا پاکستان اور امریکا کے مابین دیرینہ شراکت داری کی قدر کرتے ہیں،خوشحال پاکستان امریکا کے مفاد میں ہے۔ان کا مزید کہنا تھا حالیہ دنوں میں دوحہ میں طالبان کیساتھ دوبارہ بات چیت ہوئی۔جس میں امریکی تحفظات کے بارے میں انہیں بتایا۔