اسلام آباد (نمائندہ خصوصی) عالمی مالیاتی فنڈ (آئی ایم ایف) کی جانب سے پاکستان سے ڈو مور کا مطالبہ کیا جانے کا امکان ہے۔ ذرائع کے مطابق پاکستان اور آئی ایم ایف کے درمیان مذاکرات رواںماہ سے ہوں گے۔ مذاکرات میں نویں اقتصادی جائزہ پر بات چیت ہوگی۔ ذرائع وزارت خزانہ کا کہنا ہے کہ مذاکرات میں پاکستان سے آئی ایم ایف کی جانب سے ڈو مور کا مطالبہ کیے جانے کا امکان ہے۔ ذرائع کا کہنا ہے کہ آئی ایم ایف کی جانب سے پیٹرول پر لیوی 31 دسمبر تک 50 روپے فی لٹر کرنے کا مطالبہ ہو سکتا ہے جبکہ ڈیزل پر لیوی اپریل 2023 تک 50 روپے فی لٹر کرنے کا مطالبہ بھی ہو سکتا ہے۔ ذرائع کے مطابق مذاکرات میں پیٹرولیم مصنوعات پر سیلز ٹیکس عائد کرنے کا مطالبہ ہو سکتا ہے۔ وزارت خزانہ کے ذرائع کا کہنا ہے کہ آئی ایم ایف سے مذاکرات میں پیٹرولیم مصنوعات پر زیرو سیلز ٹیکس کو مرحلہ وار ختم کرنے پر بات ہو گی۔ ٹیکس آمدن بڑھانے کے لیے مختلف تجاویز کا جائزہ لیا جائے گا۔ ذرائع کا بتانا ہے کہ مذاکرات میں سبسڈیز کو محدود کرنے اور صرف غریب طبقے کے لیے مختص کرنے پر بھی بات ہو گی۔ پٹرول کی قیمت کم ہونے کی بجائے آئی ایم ایف کی طرف سے بڑھنے کا امکان ہے۔