لاہور(سپورٹس رپورٹر)آئی سی سی نے ٹی ٹونٹی پلیئرز کی تازہ ترین رینکنگ جاری کردی، سری لنکن سپنر ونیندو ہسارنگا ایک مرتبہ پھر نمبر ون باﺅلر بن گئے۔ ہسارنگا 704 پوائنٹس کےساتھ پہلی پوزیشن پر ہیں، افغانستان کے راشد خان ایک درجہ تنزلی کے بعد 698 پوائنٹس کے ساتھ دوسری پوزیشن پر چلے ہیں۔ راشد خان نے ٹی ٹونٹی ورلڈ کپ میں آسٹریلیا کے جوش ہیزل ووڈ کو ٹاپ پوزیشن سے محروم کردیا تھا تاہم وہ زیادہ دیر تک اپنی ٹاپ پوزیشن کو برقرار نہ رکھ سکے۔آسٹریلیا کے جوش ہیزل ووڈ 690 پوائنٹس کے ساتھ تیسری پوزیشن پر موجود ہیں۔ٹی ٹونٹی باﺅلرز کی ٹاپ ٹین رینکنگ میں کوئی پاکستانی شامل نہیں ۔بیٹرزمیں بھارت کے سوریا کمار یادیو 869 پوائنٹس کےساتھ پہلی، پاکستان کے وکٹ کیپر بیٹر محمد رضوان 830 پوائنٹس کےساتھ دوسری اور نیوزی لینڈ کے اوپننگ بیٹر ڈیون کونوے 779 پوائنٹس کےساتھ تیسری پوزیشن پر برقرار ہیں جبکہ قومی ٹیم کے کپتان بابراعظم 762 پوائنٹس کے ساتھ چوتھے نمبر پر ہیں۔ آل راﺅنڈرز رینکنگ میں بنگلہ دیشی کپتان شکیب الحسن بدستور پہلی پوزیشن پر موجود ہیں۔
 افغان ٹیم کے کپتان محمد نبی دوسری اور بھارت کے ہاردک پانڈیا تیسری پوزیشن پر موجود ہیں۔