لاہور (نامہ نگار) پی ٹی آئی کے چیئرمین، سابق وزیر اعظم عمران خان کو سکیورٹی تھریٹس پرسی سی پی او لاہور غلام محمود ڈوگر نے گزشتہ روز پھر سکیورٹی انتظامات کا جائزہ لینے کے لئے ان کی رہائش گاہ زمان پارک کا دورہ کیا۔ ایس پیز، ایس ڈی پی اوز اور دیگر متعلقہ پولیس افسران ان کے ہمراہ تھے۔ انہوں نے عمران خان کی رہائش گاہ اور اطراف میں سکیورٹی انتظامات اور سکیورٹی ڈیوٹی چیک کی۔ سی سی پی نے وہاں تعینات پولیس افسران اور اہلکاروں کو الرٹ ہو کر ڈیوٹی کرنے کی ہدایت کی۔ انہوں نے کینال روڈ، مین بلیوارڈ گلبرگ سمیت مختلف مقامات اور شاہراہوں پر سکیورٹی ڈیوٹی بھی چیک کی اور پولیس افسران کو شہر بھر کی سکیورٹی مزید بڑھانے کا حکم بھی دیا۔ سربراہ لاہور پولیس نے کہا کہ امن و امان کی موجودہ صورتحال کے پیش نظر لاہور پولیس ہائی الرٹ رہے۔غلام محمود ڈوگر نے شہر کے داخلی و خارجی راستوں پر چیکنگ بڑھانے کی بھی ہدایت کی۔سی سی پی او لاہور نے کہا کہ پولیس مشکوک افراد،گاڑیوں اور لاوارث اشیاء  پر کڑی نظر رکھے جبکہ ڈولفن سکواڈ، پیرو اور ایلیٹ ٹیمیں اہم اور حساس مقامات کے گرد موثر پٹرولنگ کریں۔