اسلام آباد (خبر نگار خصوصی) آرمی چیف جنرل قمر جاوید باجوہ نے کراچی کا دورہ کیا۔ انہوں نے صنعتی نمائش آئیڈیاز 2022 کا دورہ کیا اور مختلف سٹالز دیکھے۔ جبکہ ملیر کینٹ کے دورہ کے موقع پر افسروں و جوانوں سے ملاقات کی اور یادگار شہداء پر پھولوں کی چادر چڑھائی۔ پاک فوج کے شعبہ تعلقات عامہ (آئی ایس پی آر) کی طرف سے جاری کردہ بیان کے مطابق سپہ سالار نے کراچی کا دورہ کیا۔ اس موقع پر کور کمانڈر لیفٹیننٹ جنرل محمد سعید نے ان کا استقبال کیا۔ جنرل قمر جاوید باجوہ نے کراچی ایکسپو سینٹر میں آئیڈیاز 2022ء کے مختلف سٹالز کا دورہ کیا۔ بیان کے مطابق آرمی چیف نے زائرین، مندوبین کے کراس سیکشن سے بھی بات چیت کی۔ جبکہ بحرین، اٹلی، سری لنکا، لیبیا، زمبابوے، یو اے ای سمیت مختلف دورہ کرنے والے مندوبین سے الگ الگ ملاقاتیں کیں۔ آئی ایس پی آر کے مطابق جنرل قمر جاوید باجوہ نے ملیر گیریژن کا دورہ کیا جہاں انہوں نے یادگار شہداء پر پھولوں کی چادر چڑھائی۔ فاتحہ خوانی کی۔ آرمی چیف نے افسران اور دستوں سے الوداعی خطاب کے دوران ان کی پیشہ ورانہ مہارت اور ڈیوٹی سے لگن کو سراہا۔ انہوں نے حالیہ شدید سیلاب کے دوران لوگوں کی مدد کے لیے فوجیوں کی انتھک بچاؤ اور امدادی کوششوں کی بھی تعریف کی۔