لاہور‘ شیخو پورہ‘ فیروزوالہ (نامہ نگاران+ نمائندہ نوائے وقت) فیض پور موٹروے انٹرچینج کے قریب پولیس مقابلہ کے دوران ایک ڈاکو ہلاک دو فرار ہو گئے۔ ہلاک ہونے والا ڈاکو اغوا برائے تاوان اور ڈکیتی کے مقدمات میں لاہور اور شیخوپورہ کو مطلوب تھا، فیض پور پل کے قریب واقع آبادی رحمان گارڈن  کے نزدیک موٹر سائیکل سوار ڈاکوؤں نے تیل سپلائی کرنے والی گاڑی کو روک کر لوٹ لیا اور گاڑی سواروں پر فائرنگ کر دی جس کے نتیجے میں ڈاکوکی فائرنگ سے اس کا ساتھی ڈاکو ہلاک‘ دوسرا ڈاکو فرار ہو گیا۔ مرنے والے ڈاکوکی شناخت خلیل کے نام سے ہوئی۔ لاہور ڈولفن پولیس نے مختلف کارروائیوں میں پولیس نے ایک زخمی ڈاکوسمیت تین ڈاکوؤں کو گرفتار کر لیا ہے۔ ترجمان ڈولفن سکواڈ کے مطابق رائیونڈ میں پولیس ریسپانڈ یونٹ نے سنیپ چیکنگ کے دوران 3 مشکوک موٹر سائیکل سواروں کو رکنے کا اشارہ کیا تو وہ فائرنگ کرتے ہوئے کھیتوں میں چھپ گئے۔ فائرنگ کے تبادلے کے بعد ایک ڈاکو زخمی اور دو فرار ہو گئے۔