لاہور(سپورٹس رپورٹر)پاکستان ہاکی فیڈریشن کے سیکرٹری جنرل حیدر حسین نے کہا ہے کہ جنوبی افریقہ میں  نیشنز کپ میں پاکستان ہاکی ٹیم کی شرکت کا معاملہ حل ہوگیا۔ پاکستان ٹیم کو جنوبی افریقہ جانے کیلئے فنڈز کے انتظامات ہوگئے ہیں۔ نیشنل بینک اور پی ایس بی نے ہمیں مالی معاونت کی یقین دہانی کرائی ہے۔ 
پی ایچ ایف کے وفد نے نیشنل بنک کے صدر رحمت حسنی سے ملاقات کی۔ہم نیشنل بنک کے صدر کے مشکور ہیں انہوں نے مشکل وقت میں ساتھ دیا۔ پی ایچ ایف نیشنل بنک سے ہاکی کی ترقی و ترویج کیلئے طویل مدت معاہدہ کرے گا۔ماضی میں بھی نیشنل بنک قومی کھیل کے فروغ میں پیش پیش رہا ہے۔ نیشنل بنک کے علاوہ پاکستان سپورٹس بورڈ نے بھی دورے کیلئے فنڈ دینے کی یقین دہانی کرائی ہے۔ پاکستان ہاکی ٹیم کو اب صرف جنوبی افریقہ کے ویزے کا انتظار ہے۔ ویزا ملتے ہیں پاکستان ٹیم نیشن کپ میں شرکت جنوبی افریقہ روانہ ہوجائے گی۔ جنوبی افریقہ میں ہونے والا نیشنز کپ پاکستان ہاکی ٹیم کیلئے بہت اہم ٹورنامنٹ ہے۔ شرکت نہ کرتے تو 15 ہزار یورو کا جرمانہ اور پابندی کا بھی سامنا کرنا پڑ سکتا تھا۔

نیشنز کپ میں شرکت سے پرولیگ کھیلنے کا سنہری موقع مل سکتا ہے جبکہ نیشن کپ میں عمدہ کارکردگی سے پاکستان کی رینکنگ بھی بہتر ہوسکتی ہے۔