اسلام آباد‘ مظفر آباد (خصوصی نامہ نگار+نوائے وقت رپورٹ) آئی ایس پی آر کے مطابق شمالی وزیرستان کے علاقے شیوا میں سکیورٹی فورسز اور دہشت گردوں میں فائرنگ کے تبادلے میں دہشتگرد کمانڈر محمد نور عرف سرکئی مارا گیا۔ قبضہ سے اسلحہ و گولہ بارود برآمد کر لیا گیا ہے۔ ہلاک دہشت گرد سکیورٹی فورسز کے خلاف دہشت گردی کی متعدد کارروائیوں میں ملوث تھا۔ سی ٹی ڈی کو اغواء برائے تاوان اور دیگر سنگین وارداتوں میں مطلوب تھا۔ ادھر نوشہرہ میں جی ٹی روڈ اکھوڑہ خٹک کے قریب دہشت گردوں نے پولیس موبائل پر فائرنگ کر دی۔ ڈی پی او عمر خان کے مطابق تین پولیس اہلکار شہید ہو گئے۔ شہید اہلکاروں میں ہیڈ کانسٹیبل منظور‘ کانسٹیبل امان اﷲ اور ڈرائیور ایاز خان شامل ہیں۔