اسلام آباد (نمائندہ خصوصی)  وزیرِ خارجہ بلاول بھٹو زرداری نے یومِ ثقافتِ سندھ پر پاکستان سمیت دنیا بھر میں یہ دن منانے والوں کو مبارکباد دی ہے۔ میڈیا سیل بلاول ہائوس کی جانب سے جاری کردہ بیان کے مطابق، پی پی پی چیئرمین نے کہا ہے کہ سندھ کی ثقافت انڈس سویلائزیشن اور اسلامی تہذیب کا حسین امتزاج ہے۔ سندھ کی ثقافت کی ماں موہن جو دڑو ہے۔ انہوں نے مزید کہا کہ سندھ کی اجرک، ٹوپی، رلی، لوک ادب، موسیقی اور روایتی کھانے اپنی ایک منفرد پہچان رکھتے ہیں۔ پاکستان کا ثقافتی تنوع  اس کی خوبصورتی اور طاقت ہے۔ دنیا بھی اس پر متفق ہے کہ ثقافتی تنوع انسانیت کا مشترکہ ورثہ ہے۔ پاکستانی ثقافت، آرٹ اور ادب کو فروغ دینا پاکستان پیپلز پارٹی کا منشور ہے۔ انہوں نے پاکستانی نوجوانوں پر زور دیا کہ وہ اپنی ثقافت کو دنیا میں  اجاگر کرنے کے لیے اپنا کردار ادا کریں۔