ڈیرہ اسماعیل خان میں آپر یشن،کالعدم ٹی ٹی پی کے 3دہشت گرد ہلاک، ایک زخمی
ڈیرہ اسماعیل خان (این این آئی) ڈی آئی خان میں فورسز کی کارروائی میں 3 دہشتگرد ہلاک اور ایک زخمی ہوگیا۔ سکیورٹی ذرائع کے مطابق پولیس، سی ٹی ڈی اور سکیورٹی فورسز نے ڈیرہ اسماعیل خان کی تحصیل درابن میں دہشتگردوں کی موجودگی کی اطلاع پر کارروائی کی۔ ذرائع نے بتایا کہ یہ کارروائی علاقہ گرہ مستان میں کی گئی جہاں دہشتگردوں نے خفیہ ٹھکانوں سے فورسز پر حملہ کیا۔ سکیورٹی ذرائع کے مطابق فورسز سے فائرنگ کے تبادلے میں 3 دہشتگرد ہلاک ہوگئے جن کا تعلق کالعدم ٹی ٹی پی سے تھا۔ جبکہ دہشتگردوں کی شناخت منیب، جنید الرحمان، شوکت کے نام سے ہوئی ہے۔
