صفدر آباد ؍لاہور (نامہ نگار) لاہور بھر میں ڈاکوؤں، چوروں نے متعدد شہریوں کو لوٹ لیا، صفدر آباد اور لاہور میں  2 ڈاکو ہلاک ہو گئے۔ سندر کے علاقہ میں نجی ہاؤسنگ سوسائٹی کے باہر  پولیس کے موٹر سائیکل سوار دو مشکوک افراد کو رکنے کا اشارہ کیا تو انہوں نے پولیس پر فائرنگ کر دی۔ پولیس کی جانب سے جوابی فائرنگ کی گئی، فائرنگ کے تبادلے میں ایک ڈاکو ہلاک ہوگیا۔ پولیس کا کہنا ہے کہ ڈاکو اپنے ہی ساتھی کی فائرنگ سے مارا گیا ہے۔ صفدرآباد، شاہکوٹ روڈ پر ندیم کریانہ سٹور پر دن دیہاڑے تین مسلح افراد ہنڈا 125پر  آئے اور 6لاکھ روپے چھین کر فرار ہونے لگے تو  سٹور کے گن مین نے ہوائی فائرنگ کر دی۔ جواب میں ڈاکوئوں نے  بھی فائرنگ شروع کر دی جس  سے ایک راہگیر زخمی ہوگیا جبکہ ڈاکوئوں کی فائرنگ سے ان کا ساتھی موقع پر جاں بحق ہو گیا ۔ شہر کے مختلف علاقوں میںڈاکوئوں اور چوروں نے متعدد شہریوں سے لاکھوں روپے  زیورات، موبائل فون، گاڑیاں، موٹر سائیکلیں اور دیگر سامان لوٹ لیا۔ گلشن راوی میں  فارمیسی پر ڈکیتی کی واردات کے دوران ڈاکوئوں نے مزاحمت کرنے پر فائرنگ کر کے سکیورٹی گارڈ مجاہد کو شدید زخمی کر دیا اور فارمیسی سے 40ہزار روپے لوٹ  لئے۔ ڈاکوؤں نے ستوکتلہ کے علاقے میں امجدکے گھر میں گھس کر  اہلخانہ کو یرغمال بنا کر 18لاکھ  زیورات، موبائل فون اور دیگر سامان، برکی میں سی این جی پمپ سے 7 لاکھ کی کیبل، نواب ٹاؤن میں اے ٹی ایم میں گھس کر تنویر کی بیٹی سے  76ہزار اور موبائل فون، سبزہ زار  میں عطاء اور اس کی والدہ سے سونے کی بالیاں، موبائل فون اور 25 ہزار، شادباغ  میں عمر سے 6 ہزار، لوئر مال میں نوید سے ہزاروں روپے اور موبائل فون، فیکٹری ایریا میں اختر سے3 ہزار  اور موبائل فون، مناواں میں احمد علی سے 2 ہزار اور موبائل فون لوٹ لیا۔ چوروں نے سندر میں ثاقب کے گھر میں گھس کر 33 لاکھ کی زیورات اور دیگرسامان، شادباغ  میں ارباز کے گھر سے 10 لاکھ 20 ہزار  زیورات، گھڑیاں، پرفیوم اور دیگر سامان ۔ ٹان شپ، غازی چوک پر سیف سٹی اتھارٹی کے پول سے کیمرے اور بیٹریاں  ڈیفنس اور شالیمار سے 2گاڑیاں، لٹن روڈ سے رکشہ جبکہ ستوکتلہ، فیکٹری ایریا، سبزہ زار، سمن آباد، قلعہ گجر سنگھ اور شفیق آباد سے 6موٹر سائیکلیں چوری کر لیں۔