لاہور(سپورٹس رپورٹر)پاکستان کرکٹ ٹیم کے اوپنر امام الحق نے کہا ہے کہ ملتان میرے لیے بہت خاص ہے جہاں سنچری بنانا خواب ہے۔ویسٹ انڈیز کیخلاف ٹیسٹ میں سنچری کی بھرپور کوشش کی لیکن ففٹی ہی بن سکی کوشش کروں گا جو فارم لگی ہے اس کو براقرار رکھوں۔سنچری سے زیادہ ملتان میں پاکستان کی جیت اہمیت رکھتی ہے کیونکہ قومی ٹیم ایک صفر سے خسارے میں ہے، سنچری کی نسبت ٹیم کی جیت پر زیادہ خوشی ہوگی۔پاکستان ٹیم کو ہوم گراؤنڈ پر سپن ٹریک سوٹ کرتا ہے اور ہمیں سپن ٹریک بنانا چاہیے۔ اگر پاکستان ٹیم آسٹریلیا یا انگلینڈ جاتی ہے تو وہاں گرین پچز ملتی ہیں ہمیں یہاں ہوم ایڈوانٹج کا فائدہ اٹھانا چاہیے اور سپن ٹریک تیار کرنا چاہیے۔ پنڈی کی نسبت ملتان کی پچ سپنرز کیلئے فائدہ مند لگ رہی ہے جہاں گیند ٹرن ہوگا، پہلے ہی سیشن میں گیند ٹرن ہوگی تو مہمان ٹیم مشکل میں آسکتی ہے۔ پنڈی ٹیسٹ میں انگلینڈ نے ٹی ٹونٹی انداز اپنایا جو بہت اچھا لگا، انگلینڈ ٹیسٹ کرکٹ کو ایک نیا رخ دے رہا ہے لیکن ٹیسٹ میں یہ انداز ابھی صرف انگلینڈ ٹیم نے ہی اپنایا ہے، آسٹریلیا کی ٹیم پاکستان آئی انہوں نے ایسا نہیں کیا۔ جب کبھی پاکستان ٹیم کیلئے ایسی پوزیشن آئی تو ہمارے ڈریسنگ روم میں ایسے بیٹرز ہیں جو جارحانہ انداز اپنا سکتے ہیں۔ابھی حال ہی میں قومی ٹیم نے سری لنکا کیخلاف 340 کا ہدف عبور کیا۔ دوسرا ٹیسٹ نیا میدان ہے اور نیا ٹیسٹ ہوگا کوشش یہ ہی ہوگی کہ پاکستان کی جیت کے ساتھ ٹیسٹ ختم ہو۔