لاہور(نامہ نگار) انویسٹی گیشن پولیس ساندہ نے شہری کے اندھے قتل میں ملوث اس کی بیوی کو بھتیجے اور ساتھی سمیت گرفتار کر لیا گیا۔ ان خیالات کا اظہار ایس پی انویسٹی گیشن اقبال ٹاؤن آفتاب احمد پھلروان نے صحافیوں سے گفتگو کو بتایا کہ پولیس ٹیم  نے کارروائی کرتے ہوئے مقتول مشتاق احمد کے قتل میں ملوث اس کی بیوی کو بھتیجے اور ساتھی سمیت گرفتار کر لیا ہے۔ ملزمہ عاصمہ بی بی کے اپنے بھتیجے قمر یوسف عرف دبی کیساتھ ناجائز تعلقات تھے۔ مقتول کو علم ہونے پر میاں بیوی کے درمیان لڑائی جھگڑے شروع ہو گئے۔ملزم قمر یوسف نے اپنی چچی کیساتھ مل کر مقتول کو راستے سے ہٹانے کا منصوبہ بنایا۔ مشتاق احمد سبزی کا کام کرتا تھا اور وقوعہ کے روز مقتول گھر میں سبزی کی تیاری میں مصروف تھا کہ ملزم قمر یوسف نے اپنے دوست حسن رضا عرف راجو کے ہمراہ مشتاق احمد پر فائرنگ کردی۔ مقتول مشتاق احمد کنپٹی پر گولی لگنے سے موقع پر ہی جاں بحق ہو گیا جبکہ ملزمان فرار ہونے میں کامیاب ہو گئے۔پولیس نے ملزمان سے آلہ قتل پسٹل اور موٹر سائیکل بھی برآمد کر لی ہے۔