لاہور(سپورٹس رپورٹر)پاکستان کرکٹ ٹیم کے بیٹنگ کوچ محمد یوسف کا کہنا ہے کہ ٹیم پْر اعتماد ہے، ملتان ٹیسٹ جیتنے کیلئے جائیں گے۔ملتان میں پریس کانفرنس کرتے ہوئے محمد یوسف کا کہنا تھا کہ اگر امام کی وکٹ نہ گرتی تو میچ میں ہماری پوزیشن زیادہ بہتر تھی۔ پچ وہ ہونی چاہیے جس میں رزلٹ نکلے، اس طرح کے میچ میں مزہ آتا ہے، پوری دنیا میں ہوم ایڈوانٹیج دیکھ کر پچ بنائی جاتی ہے، ابھی ہماری بائولنگ کم تجربہ کار ہے اور بہت کم میچ کھیلے ہوئے ہے۔ ابھی ہمارا رن ریٹ ٹھیک چل رہا ہے اٹیک بھی کیا ہے ہمارے بیٹرزنے، دو دن پڑے ہیں‘دفاعی  ہونے کا سوال پیدا نہیں ہوتا ہے میچ جیتنے کیلئے جائیں گے۔ انگلینڈ کی ٹیم ہماری ٹیم کے مقابلے میں زیادہ تجربہ کار ہے، وائٹ بال کرکٹ بہت زیادہ ہو چکی ہے اس لیے ٹیسٹ کرکٹ بھی تیز ہو رہی ہے،کرکٹ تیز ہونے سے پلیئرز ٹیسٹ میں بھی تیز کھیل رہے ہیں ۔