لاہور(سپورٹس رپورٹر) پاکستان کرکٹ بورڈ نے دورہ آسٹریلیا اور آئی سی سی ویمنز ٹی ٹونٹی ورلڈکپ کیلئے قومی ویمن سکواڈ کا اعلان کردیا۔دورہ آسٹریلیا اور ورلڈکپ کیلئے 15 رکنی ویمن سکواڈ کا اعلان کیا گیا ہے جس میں فاسٹ بائولر ڈیانا بیگ کی واپسی ہوئی ہے جبکہ طوبیٰ حسن اور سعدیہ اقبال بھی انجریز سے ریکور ہونے کے بعد ٹیم کا حصہ بن گئی ہیں۔پاکستان ویمن ٹیم جنوری میں آسٹریلیا میں وائٹ بال سیریز کھیلے گی اور ویمن ٹی ٹونٹی ورلڈکپ 10 سے 26 فروری تک جنوبی افریقہ میں ہوگا جبکہ دونوں ایونٹس کیلئے قومی ویمن ٹیم کی قیادت بسمہ معروف کریں گی۔دورہ آسٹریلیا میں ون ڈے سیریز کیلئے سکواڈ میں کپتان بسمہ معروف ،عالیہ ریاض، عائشہ نسیم، ڈیانا بیگ، فاطمہ ثنا، غلام فاطمہ، کائنات امتیاز، منیبہ علی، نشرہ سندھو، ندا ڈار ، عمیمہ سہیل، صدف شمس، سعدیہ اقبال، سدرا امین اور سدرا نواز شامل ہیں جبکہ ٹریولنگ ریزروز میں ایمن انور، جویریہ خان اور طوبیٰ حسن کو رکھا گیا ہے۔ ٹی ٹونٹی سکواڈ میں بھی یہی کھلاڑی شامل ہیں تاہم ریزروز میں غلام فاطمہ، کائنات امتیاز اور صدف شمس شامل ہیں۔سلیم جعفر قائم مقام ہیڈ کوچ اور بائولنگ کوچ جبکہ توفیق عمر بیٹنگ کوچ ہوں گے۔قومی ویمن ٹیم کی چیف سلیکٹر اسماویہ اقبال نے کہا ہے کہ بہترین ٹیموں کا انتخاب کرنے کی کوشش کی ہے، تمام کھلاڑیوں کیلئے نیک خواہشات ہیں۔دورہ آسٹریلیا میں ٹیم ون ڈے میچز 16 ، 18 اور 21جنوری کو کھیلے گی اور ٹی ٹونٹی میچز 24 ،26 اور 29 جنوری کو ہوں گے۔ آئی سی سی ٹی ٹونٹی ورلڈکپ میں پاکستان ٹیم 12 فروری کو بھارت کیخلاف میچ کھیلے گی جبکہ 15 فروری کو آئرلینڈ، 19 فروری کو ویسٹ انڈیز اور 21 فروری کو انگلینڈ سے مقابلہ ہوگا۔