لاہور(سپورٹس رپورٹر)انگلینڈ کی ٹیم پاکستان کیخلاف تیسرے ٹیسٹ میچ کے دوسرے روز ہیری بروک کی سنچری کی بدولت 354رنز بنا کر آئوٹ ہوگئی جس کے بعد اسے پہلی اننگز میں 50رنز کی برتری حاصل ہوگئی تاہم جواب میں پاکستانی ٹیم نے دوسری اننگز میں بغیر کسی نقصان کے 21رنز بنا لئے اور اسے انگلینڈ کا خسارہ ختم کرنے میں مزید 29رنز درکار ہیں، پاکستان کی جانب سے عبد اللہ شفیق چودہ اور شان مسعود تین رنز کے ساتھ وکٹ پر موجود ہیں ۔کراچی میں کھیلے جا رہے تین ٹیسٹ میچوں کی سیریز کے آخری میچ کے دوسرے دن انگلینڈ نے 7رنز ایک کھلاڑی آئوٹ سے اپنی پہلی نامکمل اننگز کا دوبارہ آغاز کیا تو بین ڈکٹ اور اولی پوپ وکٹ پر موجود تھے۔دونوں نے پراعتماد انداز میں اننگز کا آغاز کیا اور بآسانی مزید 51رنز جوڑ کر سکور کو 58تک پہنچا دیا تاہم اسی سکور پر نعمان کی گیند پر 26رنز بنانے والے ڈکٹ ایل بی ڈبلیو قرار دئیے گئے تاہم انگلینڈ کو بڑا دھچکا اس وقت لگا جب اگلی ہی گیند پر جو روٹ بھی سلپ میں کیچ دے بیٹھے اور انگلینڈ کی ٹیم یکے بعد دیگرے دو وکٹیں گنوا بیٹھی۔دوسرے اینڈ سے اولی پوپ نے ذمے دارانہ بیٹنگ کرتے ہوئے اپنی نصف سنچری مکمل کی تاہم 98 کے مجموعی سکور پر ابرار احمد کی خوبصورت گیند پر وہ اپنی وکٹیں محفوظ نہ رکھ سکے۔اس کے بعد ہیری بروک کا ساتھ دینے کپتان بین سٹوکس آئے اور دونوں نے 42رنز کی شراکت قائم کر کے کھانے کے وقفے تک مزید کوئی وکٹ نہ گرنے دی۔کھانے کے وقفے کے بعد بھی دونوں کھلاڑیوں کو کسی قسم کی مشکل پیش نہیں آ رہی تھی تاہم اس دوران محمد وسیم کی گیند پر غیرضروری طور پر تیسرا رن لینے کی کوشش میں بین سٹوکس اپنی وکٹ گنوا بیٹھے، انہوں نے آٹ ہونے سے قبل 26رنز بنائے۔اس موقع پر ایسا محسوس ہوتا تھا کہ پاکستان کی ٹیم جلد ہی انگلینڈ کی بقیہ وکٹیں بھی حاصل کر کے معقول برتری لینے میں کامیاب رہے گی تاہم ہیری بروک اور بین فوکس نے پاکستان کے ارمانوں پر پانی پھیر دیا۔دونوں کھلاڑیوں نے بہترین کھیل پیش کرتے ہوئے پورے سیشن میں مزید کوئی وکٹ نہ گرنے دی جبکہ اس دوران بروک نے ایک اور بہترین باری کھیلتے ہوئے دورہ پاکستان کے دوران اپنی تیسری سنچری بھی مکمل کر لی۔جب میچ کے دوسرے دن چائے کا وقفہ ہوا تو انگلینڈ نے 5 وکٹوں پر 254رنز بنائے تھے اور اسے پاکستان کی پہلی اننگز کا سکور برابر کرنے کیلئے مزید محض 50رنز درکارتھے۔ہیری بروک 111 رنز بناکر آئوٹ ہوئے جبکہ بین فوکس 64رنز بنا کر آئوٹ ہوئے۔ریحان احمد ایک، مارک ووڈ 35 رنز، اولی رابنسن 29 جبکہ جیک لیچ 9 رنز بنا کر آئوٹ ہوئے۔ ابرار احمد اور نعمان علی نے 4‘ 4 وکٹیں حاصل کیں۔پاکستان نے دوسری اننگز میں بغیر کسی نقصان کے 21رنز بنا لئے ہیں اور مہمان ٹیم کی برتری ختم کر نے کیلئے پاکستانی ٹیم کو مزید 29رنز درکار ہیں۔ پاکستان کی جانب سے عبد اللہ شفیق 14 اور شان مسعود 3 رنز کیساتھ وکٹ پر موجود ہیں ۔ پاکستان کی ٹیم پہلی اننگز میں 304رنز بنا کر آئوٹ ہو گئی تھی۔ انگلینڈ کو سیریز میں 0-2کی فیصلہ کن برتری حاصل ہے۔