لاہور(سپورٹس رپورٹر)سابق ٹیسٹ کرکٹر اعجاز احمد کرکٹ ٹیم کے ریٹائر ہونے والے بیٹراظہر علی کے پاس کیک لے کر پہنچ گئے۔اظہر علی کو آنر کرنے کیلئے اعجاز احمد نے اپنی بیٹی کو خصوصی طور پر لاہور سے کراچی بلایا، وہ بیٹی کے ہمراہ کیک لے کر اظہر علی کے پاس ہوٹل پہنچے۔بعد ازاں اعجاز احمد اور ان کی بیٹی نے اظہر علی اور ان کی فیملی کے ہمراہ کیک کاٹا۔ اعجاز احمد نے کہا کہ اظہر علی ہمارے سامنے کرکٹ کھیلتے قومی ٹیم تک پہنچے ،وہ قومی ٹیم اور ڈومیسٹک میں میری کوچنگ میں بھی کھیلے۔ اظہر علی اچھے کرکٹر ہی نہیں ایک نفیس انسان بھی ہیں ، ان کی خدمات کو سراہنے کیلئے خود ان کے پاس گیا۔ اظہر علی کیلئے نیک خواہشات ہیں اور وہ آئندہ زندگی میں بھی کامیاب ہوں۔ اظہر علی اور ان کی فیملی نے اعجاز احمد اور ان کی بیٹی کا شکریہ ادا کیا۔