لاہور(سپورٹس رپورٹر)نیوزی لینڈ کے لیفٹ آرم سپنر اعجاز پٹیل نے کہا ہے کہ وکٹ بیٹنگ کیلئے اچھی ہے، اس میں سپن یا فاسٹ بائولرز کیلئے زیادہ کچھ نہیں۔ ہم نے اچھی بائولنگ کی جس کی وجہ سے میچ میں ہماری پوزیشن اچھی ہوئی، آج کا دن ہمارے لیے کافی اہم ہے، ابھی یہ نہیں سوچا کہ پاکستان کیخلاف کتنی برتری حاصل کرنی ہے،پہلا ہدف تو یہ ہے کہ پاکستان کا سکور برابر کریں، پھر آگے کا سوچیں، یہ اہم ہے کہ آج وکٹ کیسے رہتی ہے، صبح موسم کی وجہ سے وکٹ پر نمی رہتی ہے، اس سے بائولرز کو فائدہ رہتا ہے، صبح کا سیشن اہم ہوتا ہے مگر بعد میں وکٹ خشک ہوجاتی ہے۔اگر آج وکٹ پر کریک آئیں گے تو بائولرز کیلئے فرق پڑے گا، ہم نے دونوں دن نئی گیند سے سے شروعات کی تو اس سے فائدہ ہوا تھا، بابر اور سرفراز نے کافی اچھی بیٹنگ کی تھی، جب بھی ہم نے لوز بالز کیں، اس کا انہوں نے فائدہ اٹھایا، ہم انہیں زیادہ ڈاٹ بالز نہیں کرپارہے تھے، پریشر ڈالنا مشکل تھا۔ اردو زبان سمجھ آتی ہے اس سے اندازہ ہوجاتا ہے کہ پاکستانی کھلاڑی کیا پلان کر رہے ہیں، ویسے بھی زبان آئے نہ آئے، بطور پلیئر سمجھ آجاتا ہے کہ اگلا پلیئر کیا کرنے والا ہے۔