لاہور‘ فیروزوالا (نامہ نگاران) ڈاکوؤں اور چوروں نے شہرکے مختلف علاقوں میں وارداتوں کے دوران متعدد شہریوں سے لاکھوں روپے‘ طلائی زیورات، موبائل فون، گاڑیاں، موٹر سائیکلیں اور دیگر سامان لوٹ لیا ہے۔ فیروز والا میں مزاحمت پر ڈاکوؤں نے 2 افراد قتل کر دیئے۔ ڈاکوؤں نے جنوبی چھائونی میں ادریس کے گھرگھس کر اہلخانہ کو گن پوائنٹ پر یرغمال بنا کر 5 لاکھ 60 ہزار روپے‘ ڈیفنس میں اویس اور اس کی فیملی سے 3 لاکھ روپے، برکی کے علاقے میں دلاور اور اس کی فیملی سے ڈھائی لاکھ روپے مالیت، کاہنہ میں امتیاز کے گھر سے 2 لاکھ روپے، بھاٹی گیٹ میں یاسین اور اس کی فیملی سے ایک لاکھ70 ہزار روپے، گلشن راوی کے علا قہ میں افضال اور اس کی فیملی سے ڈیڑھ لاکھ روپے مالیت کی نقدی، طلائی زیورات، موبائل فون اور دیگر سامان لوٹ لیا ہے۔ چوروں نے ڈیفنس، گلبرگ اور ستوکتلہ سے تین کاریں جبکہ گلشن راوی، وحدت کالونی، مصری شاہ، لاری اڈہ، گجر پورہ اور لٹن روڈ کے علاقوں سے 6 موٹر سائیکلیں چوری کر لی ہیں۔ سگیاں چوک کے قریب موٹر سائیکل سوار ڈاکوؤں نے گن پوائنٹ پر کار سوار ذیشان اور فیملی کو روک کر لوٹ لیا۔ ڈاکو چار لاکھ روپے کی رقم اور دو موبائل چھین کر لے گئے۔ ونڈالہ نہر پر ڈاکوؤں نے ناکہ لگا کر میاں بیوی سمیت متعدد افراد کو لوٹ لیا۔ ڈاکوؤں نے مزاحمت کرنے پر عثمان اور  راہگیر کو تشدد کا نشانہ بنایا، ڈاکو لوٹ مار کرنے کے بعد فرار ہوگئے۔ کالا خطائی روڈ پر ڈاکوؤں نے گولی مار کر ایک شخص اسلم کو ہلاک کر دیا۔ ڈاکو بغیر لوٹ مار کے فرار ہو گئے۔ جی ٹی روڈ پر واقع گاؤں ٹپیالہ کے قریب ڈاکو نے ناکہ لگا کر متعدد راہگیروں کو لوٹ لیا‘ اسی علاقہ میں ایک نوجوان قاسم رضا کی نعش سڑک کے کنارے زخموں سے چور ہوئی پائی گئی۔ نوجوان کی ہلاکت ٹریفک حادثہ یا واردات کے دوران قتل، پولیس  نے دونوں پہلوئوں کی روشنی میں تفتیش شروع کر دی۔ پولیس نے واقعہ کا مقدمہ حادثہ زیر دفعہ لگا کر درج کر لیا۔ لاہور روڈ پر ڈاکوؤں نے عامر رفیق کو روک کر لوٹ لیا۔ اس سے نقدی موبائل چھین کر لے گئے۔ چکوک ایریا میں شہروں اور ڈاکوؤں کے درمیان مقابلہ ہوا جس کے نتیجے میں 2 ڈاکو شدید زخمی ہو گئے۔ ہسپتال داخل کرا دیا گیا۔