بھکر‘ اختر آباد (نامہ نگاران) مجوکہ نشیب میں 3 ڈاکو ناکہ لگا کر لوٹ مار کر رہے تھے موٹر سائیکل سوار چچا بھتیجا کی مزاحمت پر ڈاکوؤں کی فائرنگ سے چچا اشفاق موقع پر جاں بحق ہوگیا جبکہ بھتیجا عنصر زخمی ہوگیا۔ واقعات کے مطابق شہری دودھ کے کاروبار سے منسلک، ڈی آئی خان سے واپس گھر لوٹ رہے تھے۔  رقم چھیننے کی کوشش میں ناکامی پر 3 ڈاکوئوں نے اندھا دھند فائرنگ کر دی۔ 9 ڈاکوئوںکی کاشتکار کے ڈیرہ میں گھس کر فائرنگ سے کاشتکار جاں بحق اور  ایک شدید زخمی ہو گیا۔ حالت تشویشناک ہے، ڈی پی او فرقان بلال کی جرم چھپانے کی پالیسی پر عمل پیرا پولیس کا واردات ڈکیتی کو قاتلانہ اقدام کا رنگ دینے کی خاطر دبائو، بائیس گھنٹے لیت ولعل کے بعد میڈیا کی مداخلت پر مقدمہ درج کیا۔ شہریوں نے ڈی پی او مردہ باد کے نعرے لگا دئیے۔ جان پورہ روڈ پر کاشتکار بشیر کمبوہ اپنے زرعی ڈیرہ پر موجود تھا کہ اچانک نو مسلح ڈاکو داخل ہوگئے، جنہوںنے مزاحمت پر فائرنگ کر دی۔ گولی سر میں لگنے سے بشیر کمبوہ شدید زخمی ہو کر گر پڑا جسے بچانے کی کوشش میں خرم نامی شخص کو بھی ڈاکوئوں نے شدید زخمی کر دیا۔ زخمیوں کو تشویشناک حالت کے پیش نظر لاہور ہسپتال منتقل کر دیا گیا جہاں بشیر کمبوہ جان کی بازی ہار کر جاں بحق ہو گیا۔