لاہور (نامہ نگار) ڈاکوؤں اور چوروں نے شہر کے مختلف علاقوں میں وارداتوں کے دوران متعدد شہریوں سے لاکھوں روپے، طلائی زیورات، موبائل فون، گاڑیاں، موٹر سائیکلیں اور دیگر سامان لوٹ لیا ہے۔ ڈاکوؤں نے ہنجروال کے علاقے میں راحیل کے گھر میں گھس کر اہلخانہ کو گن پوائنٹ پریرغمال بنا کر 6لاکھ 30ہزار روپے مالیت، باٹا پور کے علاقے میں رضوان کے گھر گھس کر اسلحہ کے زور پر 5لاکھ 23 ہزار روپے، شادباغ کے علاقے میں ماجد اوراس کی فیملی سے 4لاکھ 90 ہزار روپے، مسلم ٹاؤن کے علاقے میں منصور اور اس کی فیملی سے 3لاکھ 20ہزار روپے، طلائی زیورات، موبائل فون اور دیگر سامان، شالیمار میں داؤد سے 4 لاکھ 10ہزار روپے، ساندہ میں بشارت سے گن پوائنٹ پر 60 ہزار روپے اور موبائل فون، ماڈل ٹاؤن میں نصیر سے 12 ہزار روپے اور موبائل فون لوٹ لیا اور فرار ہوگئے ہیں۔ چوروں نے سندرکے علاقے میں ساجد کے گھر سے 4لاکھ روپے، طلائی زیورات و دیگر سامان چوری کر لیا ہے۔ چوروں نے نصیرآباد، کاہنہ اور وحدت کالونی سے تین گاڑیاں، برکی کے علاقے سے رکشہ جبکہ مصری شاہ، شاہدرہ، شادمان، ملت پارک، مصطفی ٹاؤن، گرین ٹاؤن اور سول لائن کے علاقوں سے سات موٹر سائیکلیں چوری کر لیں۔