لاہور(سپورٹس رپورٹر)پاکستان کرکٹ ٹیم کے وکٹ کیپر بیٹر سرفراز احمد 3 یا اْس سے کم ٹیسٹ میچز کی سیریز میں سب سے زیادہ رنز بنانے والے پاکستانی وکٹ کیپر بیٹر بن گئے ہیں۔انہوں نے 4 سال بعد ٹیم میں واپسی پر ناقدین کو اپنے بلے سے جواب دے دیا۔سرفراز احمد نے نیوزی لینڈ کے خلاف 2 ٹیسٹ میچز کی سریز میں 335 رنز بنائے، انہوں نے سیریز کی چاروں اننگز میں شاندار بیٹنگ کی۔وکٹ کیپر بیٹر نے پہلے ٹیسٹ میچ میں 2 نصف سنچریوں کی بدولت 139 رنز سکور کیے جبکہ دوسرے میچ میں وہ ایک سنچری اور ایک نصف کے ذریعے 196 رنز بنانے میں کامیاب رہے۔ سرفراز احمد نے دونوں ٹیسٹ میچز کے دوران 3 نصف سنچریاں اور ایک سنچری بنائی، ان کا ہائی سکور 118 رنز رہا۔