کراچی (نوائے وقت رپورٹ) پاکستان پیپلز پارٹی کے رہنما سعید غنی نے کہا کہ پیپلز پارٹی کل اتوار کو بھرپور سیاسی طاقت کا مظاہرہ کرے گی۔ سعید غنی نے کہا کہ آج اجلاس میں بلدیاتی الیکشن کی تیاریوں کا جائزہ لیا گیا، اجلاس میں فیصلہ ہوا ہے کہ اتوار کے روز کراچی میں بڑی ریلی نکالی جائے گی، ریلی میں پیپلز پارٹی کے کارکن، بلدیاتی الیکشن میں حصہ لینے والے امیدوار شامل ہوں گے۔ ریلی بھرپور سیاسی طاقت کا مظاہرہ ہو گا، جس سے ثابت ہوجائے گا کہ کراچی شہر میں کس جماعت کی اکثریت ہے۔ کراچی میں بلدیاتی انتخابات کیلئے ماحول سازگار ہے۔ اس موقع پر گفتگو کرتے ہوئے سعید غنی کا کہنا تھا کہ عمران خان اور شیخ رشید کی حرکتیں ایک جیسی ہیں۔