فیروز والا‘ اوکاڑہ (نامہ نگاران) اوکاڑہ میں شدید دھند کے باعث 2حادثات میں خاتون سمیت 12افراد شدید زخمی‘ فیروز والا میں باپ بیٹی جاں بحق‘ 4 زخمی ہوگئے۔ شدید دھند میںپولیس وین گرین بیلٹ سے ٹکرا جانے کے باعث 6پولیس ملازمین جبکہ اوکاڑہ قصور روڈ پر مسافر وین ٹریکر ٹرالی سے ٹکرا گئی۔ خاتون سمیت 6افراد شدید زخمی ہوگئے۔ بتایا گیا ہے کہ اوکاڑہ پولیس معمول کی گشت کر رہی تھی کہ یونیورسٹی آف اوکاڑہ کے قریب شدید دھند کے باعث پولیس وین گرین بیلٹ سے ٹکرا گئی۔ کوٹ علی محمد قصور دیپالپور روڈ پر گزشتہ سے پیوستہ شب مسافر کوسٹر دھند کے باعث گنے سے لدے ٹریکٹر ٹرالر سے پیچھے سے جا ٹکرائی جس کے نتیجہ میں آگ لگ گئی۔ زخمیوں کو ہسپتال منتقل کر دیا گیا۔ ایمن آباد کا رہائشی شبیر احمد اپنی بیوی  صوبیہ اور شیر خوار  بیٹی کے ہمراہ رکشہ پر سوار ہوکر لاہور  آ رہے تھے۔ کالا شاہ کاکو کے قریب  تیز رفتار  ٹرک نے رکشہ کو ٹکر مار دی جس کے نتیجے میں رکشہ الٹ گیا‘ شبیر احمد، اس کی شیر خوار بیٹی  عنایہ شبیر موقع پر جاں بحق جبکہ اس کی بیوی  سمیت چار افراد زخمی ہو گئے۔ ڈرائیور فرار ہوگیا۔ فیروزوالا پولیس نے   نعشوں  کو  قبضہ میں لے کر ضروری کارروائی  کے بعد ورثا کے حوالے کر دیا۔ پولیس نے  ٹرک ڈرائیور خلاف مقدمہ درج کرلیا۔