لاہور (سپورٹس ڈیسک) سعودی عرب کے فٹبال شائقین کرسٹیانو رونالڈو کی نئی ٹیم النصر کا میچ دیکھنے کیلئے لاکھوں ریال کا ٹکٹ لینے پر بھی تیار ہو گئے۔ ریاض میں دوستانہ فٹبال میچ جس کیلئے ایک خاص اور نمایاں ٹکٹ رکھی گئی  جس کی قیمت 30لاکھ ریال تک پہنچ چکی ہے۔ خاص ٹکٹ پر بولی 17جنوری تک جاری رہے گی اور ممکن ہے اس کی قیمت میں مزید اضافہ  ہو جائے۔ تاریخی فٹبال میچ پیرس سینٹ جرمین ایف سی اور مقامی فٹبال کلب النصر اور الہلال کے سٹار کھلاڑیوں کے درمیان 19جنوری کو ہوگا۔ کرسٹیانو رونالڈو، میسی، نیمار اور دیگر کھلاڑی شریک ہوں گے۔ میچ کی خاص ٹکٹ  حاصل کرنے والا انتہائی اہم فرد ہو گا، وہ جیتنے والی ٹیم کو ٹرافی، میڈل دینے کیساتھ تمام سٹار کھلاڑیوں سے ملاقات بھی کرے گا۔ ٹکٹ رکھنے والا شخص اپنے پسندیدہ کھلاڑیوں کیساتھ تصاویر لے گا اور ٹیم کیساتھ خصوصی لنچ میں شرکت کرنے کے علاوہ دیگر مراعات بھی حاصل کرے گا۔ میچ کی خاص ٹکٹ کی بولی کا آغاز 10لاکھ ریال سے کیا گیا تھا۔ سعودی عرب کے معروف تاجر نے 22لاکھ ریال کی بولی لگائی جس کے کچھ دیر بعد اس پر بولی 30لاکھ ریال تک پہنچ گئی۔ میچ کی انتظامیہ کے مطابق اس خاص ٹکٹ سے حاصل ہونے والی تمام رقم خیراتی ادارے کو عطیہ کی جائے گی۔