کنشاسا (انٹرنیشنل ڈیسک) وسطی افریقی ملک کانگو کے ایک چرچ میں ہونے والے بم دھماکے میں 5 افراد ہلاک اور متعدد زخمی ہوگئے۔ جس وقت بم دھماکا ہوا، اْس وقت چرچ میں بڑی تعداد میں لوگ دعا کے لیے موجود تھے۔ دھماکا اتنا زور دار تھا کہ باہر کھڑی گاڑیوں کے شیشے ٹوٹ گئے۔ دھماکے میں بھگدڑ مچ گئی۔ افراتفری کے دوران قدموں تلے کچلے جانے کے باعث کئی افراد زخمی ہوگئے۔ امدادی کارکنوں نے متاثرین کو ہسپتال منتقل کیا۔ تاحال کسی گروپ نے بم دھماکے کی ذمہ داری قبول نہیں کی ہے۔ پولیس نے ایک انکوائری کمیٹی تشکیل دے دی۔ جس چرچ پر بم دھماکا کیا گیا وہ یوگنڈا کی سرحد کے قریب واقع ہے۔