لاہور(سپورٹس رپورٹر)پاکستان کرکٹ بورڈ کی سلیکشن کمیٹی کے نئے سربراہ کیلئے مینجمنٹ کمیٹی کے اہم رکن شکیل شیخ کا نام بطور چیف سلیکٹر اس وقت سر فہرست ہے۔ذرائع کے مطابق چیئرمین نجم سیٹھی اس بارے میں جلد اہم فیصلہ کریں گے تاہم مینجمنٹ کمیٹی کے 14 ارکان کی رائے یہ ہے کہ اسلام آباد ریجن کے سابق سربراہ اور مینجمنٹ کمیٹی کے متحرک رکن شکیل شیخ اس عہدے کیلئے ایک بہترین چوائس ثابت ہو سکتے ہیں۔شکیل شیخ نے کہا کہ نجم سیٹھی اور مینجمنٹ کمیٹی کے ارکان کیساتھ وہ بورڈ کے معاملات کو باریک بینی کیساتھ دیکھ رہے ہیں تاہم سلیکشن کمیٹی کے سربراہ کی حیثیت سے کام کرکے وہ اپنے آپ کو محدود نہیں کرنا چاہتے۔ وہ گراس روٹ لیول اور ڈومیسٹک سطح پر گزشتہ تین سال کے درمیان جو تباہی ہو چکی، اس کے بعد معاملات خاصے گمبھیر ہیں۔ وہ سمجھتے ہیں کہ اس معاملے میں ان کا تجربہ انہیں اس بات کی اجازت نہیں دیتا کہ اس صورتحال میں وہ اس جانب توجہ دینے کے بجائے کسی اور سمت میں سفر کریں۔ نجم سیٹھی پاکستان کرکٹ کے اندرونی معاملات پر خاصی گہری نگاہ رکھتے ہیں، انہیں امید ہے کہ ان کی سربراہی میں بورڈ درست سمت میں گامزن ہے اور وہ سمجھتے ہیں کہ نجم سیٹھی جلد نئے چیف سلیکٹر کا نام پیش کر دیں گے۔