لاہور ( سپورٹس رپورٹر) پاکستان سپر لیگ کی چیمپئن لاہور قلندرز کے کپتان شاہین شاہ آفریدی نے کہا ہے کہ میں نے اپنی پرفارمنس یا ٹائٹل کے دفاع کا کوئی ٹارگٹ سیٹ نہیں کیا، میری توجہ اس وقت اپنی فٹنس پر ہے اور اس کیلئے میں محنت کر رہا ہوں۔ پی ایس ایل 8 میں شائقین کو لاہور قلندرز کی طرف سے اچھی کرکٹ دیکھنے کو ملے گی، ہماری ٹیم پاکستان سپر لیگ کیلئے تیار ہے۔ ہماری ٹیم میں آٹھ نو کھلاڑی وہی ہیں جو پہلے بھی پلئینگ الیون کا حصہ ہیں، جہاں ہمیں ضرورت تھی وہاں ہم نے نئے کھلاڑیوں کو لیا ہے، اس لیے میں کہہ سکتا ہوں کہ پی ایس ایل 8 کیلئے ہماری ٹیم اچھی بنی ہے۔ سکندر رضا اور لیام ڈاسن دنیا بھر میں لیگز کھیل رہے ہیں، سکندر رضا کی حالیہ کارکردگی شاندار ہے، آئی سی سی ٹی ٹونٹی ورلڈ کپ میں بھی وہ اچھا کھیلے۔ میں ابھی اپنی تیاریوں سے انجوائے کر رہا ہوں، وقت آنے پر چیزیں دیکھتا ہوں۔